Salgs­betingelser

1. Avtalen

Avtalen består av desse salgsbetingelsane, opplysningane du får når du bestiller, og eventuelle særskilde avtalar mellom deg og oss. Ved motstrid gjeld det som er særskilt avtalt.

Avtalen er regulert av norsk lov, under dette avtalelova, angrerettlova og markedsføringslova. Desse lovene gir deg som forbrukar rettar som ikkje kan avtalast vekk.

2. Partane

Seljar er Sogndal Fjordsauna AS, org.nr. 837 519 012. Vi tek imot førespurnader via Facebook-sida vår, Sogndal Fjordsauna. Desse betingelsane kallar oss «vi» eller «seljar».

Kjøpar er personen som bestiller og betaler, og blir kalla «du» eller «kjøpar».

3. Kva vi sel

Vi sel bruk av badstu. Badstua er mobil og vedfyrt, og står på ein tilhengar i og rundt Sogndal. Tenestene er:

• Privat time: 90 minutt der heile badstua er berre for gruppa di, med opptil 8 personar.
• Heildagsleige: Badstua er utleigd til deg for ein heil dag, og vi kan levere og hente henne der du ønskjer.

Kvar badstua står til ei kvar tid, blir opplyst på nettsida og på Facebook og Instagram.

4. Prisar

Alle prisar er i norske kroner (NOK) og inkluderer alle avgifter. Det kjem ingen ekstra gebyr for betalinga.

Det er prisen som blir vist ved bestilling, som gjeld for kjøpet ditt.

5. Bestilling og stadfesting

Du bestiller privat time på nettsida: vel ei ledig tid i kalenderen, fyll ut skjemaet og betal. Avtalen er bindande når betalinga er gjennomført. Du får då kvittering og stadfesting på e-post.

Heildagsleige blir avtalt direkte med oss. Avtalen er bindande når vi har stadfesta bestillinga skriftleg.

Ein privat time må bestillast seinast 12 timar før han startar.

6. Betaling

På nettsida betaler du med bankkort (Visa, Mastercard), Apple Pay, Google Pay eller Vipps. Beløpet blir trekt når du bestiller. Kortbetalingar går gjennom betalingsleverandøren Stripe. Vi ser eller lagrar aldri kortopplysningane dine.

7. Gjennomføring av timen

• Møt opp til avtalt tid. Timen startar og sluttar til fastsett tid, også om du kjem for seint.
• Opptil 8 personar kan bruke badstua samtidig.
• Ved privat time fyrer vi opp badstua slik at ho er varm når du kjem.
• Følg instruksjonane som heng i og ved badstua.

8. Angrerett

Det er ikkje angrerett på bestilling av badstutime eller badstuleige. Unntaket står i angrerettlova § 22 bokstav m: angreretten gjeld ikkje fritidstenester der avtalen fastset eit bestemt tidspunkt eller tidsrom for levering. Du kan likevel avbestille etter punkt 9 under.

9. Avbestilling og endring

• Meir enn 24 timar før timen: Du får heile beløpet tilbake, eller kan flytte timen kostnadsfritt.
• Mindre enn 24 timar før timen: Beløpet blir ikkje refundert. Ta likevel kontakt med oss. Om vi får selt tida til nokon andre, prøver vi å finne ei løysing.
• Kjem du ikkje, får du ikkje pengane tilbake.

Du avbestiller eller endrar ved å sende oss melding på Facebook. Refusjon går tilbake til same betalingsmiddel som du brukte, normalt innan 14 dagar.

10. Avlysing frå vår side

Vi kan måtte avlyse ein time på grunn av farleg vêr, tekniske feil, sjukdom eller feil i bookingkalenderen. Då får du velje mellom å få heile beløpet tilbake eller å flytte til ei anna ledig tid. Vi gir beskjed så tidleg som mogleg.

11. Reklamasjon

Er ikkje tenesta slik ho var avtalt, må du gi oss beskjed innan rimeleg tid etter at du oppdaga feilen. Skriv kort kva som var gale. Vi går gjennom saka og kan tilby ny time, prisavslag eller refusjon, alt etter kva som er rimeleg.

12. Tryggleik og ansvar

• Du brukar badstua på eige ansvar. Er du usikker på om helsa di tåler badstu, bør du spørje lege før du bestiller.
• Bruk av badstua under påverknad av alkohol eller andre rusmiddel er ikkje tillate.
• Born under 18 år må vere i følgje med ein vaksen som har ansvaret for dei.
• Kjøparen er ansvarleg for skade på badstua eller utstyret som skjer med vilje eller ved aktløyse i leigeperioden.

13. Personopplysningar

Når du bestiller, hentar vi inn namn, e-post, telefonnummer og tid for bestillinga. Desse opplysningane bruker vi berre for å gjennomføre og stadfeste bestillinga, og for å kontakte deg om timen. Vi sel aldri opplysningane vidare. Betalinga blir behandla av Stripe og Vipps etter deira eigne personvernreglar. Vi tek vare på opplysningane så lenge bokføringslova krev det. Du kan be om innsyn, retting eller sletting ved å kontakte oss.

14. Konfliktløysing

Klager skal sendast til oss først. Vi prøver å løyse ein eventuell tvist i minnelegheit. Kjem vi ikkje fram til ei løysing, kan du ta kontakt med Forbrukarrådet for mekling. Forbrukarklageutvalet kan òg behandle saka.